Reglur um notkun gervigreindar hjá Orkuveitunni

Gervigreind (e. AI) er öflugt tæki sem getur stutt við nýsköpun, hraðari ákvarðanatöku og aukna skilvirkni í daglegu starfi. Notkun hennar skal ávallt vera í samræmi við gildi Orkuveitunnar - frumkvæði, framsýni, hagsýni og heiðarleika - og fylgja íslenskum lögum, innri stefnum fyrirtækisins og reglum um öryggi og persónuvernd.

1. Meðferð gagna

• Ekki má setja inn viðkvæmar eða persónugreinanlegar upplýsingar í fyrirmæli til gervigreindar nema fyrir liggi skýr heimild frá stjórnendum Orkuveitunnar.
• Öll vinnsla skal fara fram í öruggu umhverfi og í samræmi við persónuverndarstefnu fyrirtækisins og GDPR.

2. Réttmæti og ábyrg notkun

• Gögn og niðurstöður frá gervigreind skulu yfirfarnar með gagnrýnum hætti, þar sem AI getur verið óáreiðanlegt eða hlutdrægt.
• Gervigreind er ekki heimild, heldur stuðningstæki. Notandi ber ábyrgð á því að sannreyna upplýsingar áður en þær eru nýttar opinberlega eða teknar sem grundvöllur ákvarðana.

3. Gagnsæi og heiðarleiki

• Vertu skýr/ur um hvenær og hvernig þú notar gervigreind í starfi.
• Tilgreina skal hvort efni hafi verið unnið eða aðstoðað af AI þegar það á við.

4. Lærdómur og þróun

• Kynntu þér reglulega nýja möguleika og takmarkanir AI-tækja.
• Deildu dæmum, lærdómi og áskorunum með samstarfsfólki - með því eflum við sameiginlega þekkingu og þróun innan fyrirtækisins.

5. Í takt við stefnu Orkuveitunnar

• Notkun gervigreindar skal vera í samræmi við upplýsingatæknistefnu, stefnu um upplýsingavernd og eigendastefnu Orkuveitunnar.
• Öll notkun skal styðja við markmið fyrirtækisins um sjálfbærni, öryggi, nýsköpun og ábyrgð gagnvart samfélaginu.

🛑 Dæmi um gögn sem ekki má setja í opna gervigreind

Það er mikilvægt að átta sig á hvað telst til viðkvæmra gagna. Hér eru dæmi um gögn sem aldrei ætti að setja í gervigreindartól nema þau séu sérstaklega vottuð fyrir slíkt (t.d. innri Enterprise lausnir):

• Persónuupplýsingar: Nöfn, kennitölur, heimilisföng, símanúmer eða viðkvæmar upplýsingar um starfsfólk eða viðskiptavini.
• Lykilorð og öryggislyklar: Aðgangsorð, API lyklar, dulkóðunarlyklar eða önnur öryggisgögn.
• Viðkvæm fjárhagsgögn: Óbirt uppgjör, bankaupplýsingar, samningar í vinnslu eða viðkvæmar tölur um rekstur.
• Trúnaðarmál: Upplýsingar um óbirt verkefni, stefnumótun sem ekki er opinber, eða önnur mál sem falla undir trúnað.

Þumalputtaregla: Ef þú myndir ekki vilja að upplýsingarnar birtust á forsíðu blaðanna, ekki setja þær í gervigreindina.

📝 Hvernig á að vísa í gervigreind?

Þegar gervigreind er notuð í vinnu, skýrslugerð eða verkefnum er góður siður (og oft krafa) að geta þess.

Dæmi um tilvísun:

"Þessi texti var unninn með aðstoð ChatGPT við umorðun og yfirlestur."

Dæmi í skýrslu:

"Greining á gögnum var studd af Microsoft Copilot, en niðurstöður voru yfirfarnar og staðfestar af höfundi."

Ef gervigreind bjó til mynd:

"Myndin var búin til með DALL·E 3."